Hi thil thu hi ziek ding le hril ding a kan san na asawt ta achu ka ṭawng mawl lei hin mawi taka ziek hi ka thei ve naw a , ka nu in ami liemsan boruok le an rem kata hun remchang dan ang taka mawl deua hung ziek ve kani aw!
Naupangte cho nilang khawm kalo seilienpui ruol tamtak kalo chan ve ta a, tla hmasak el khawm khan Synod Presbytery a naupang biekin inkhawm a kalo in hmelhriet puia kalo inpawlpui hlak Wilson Newme in ami lo liemsan a, Good Shepherd School Hostel a khawm kanlo um kawp a , Hostel anthawk kan suoka Haflong tieng kan hung pan khawm khan Iron Maiden hai hla kha a hmuom ri ve nuol a. Duhkim le Manni, hai hi hming ṭhen hai chu an na , hieng hai tilo ka hrilsa lo tamtak an uma , School a kalo kai pui hai puitling hnung chena zu kalo dawnpui hai le ruithei dang a kan pawlpui hai khawm an uma. Ka hrietlo a milo liensan chanchin ka lak tak lo hi iengzam an um ding?
Nitin a inbiek pui hi ka neive naw a , in hmunkhat a um ka sang Lalsiemrem tak ngiel khom hi bieknaw chang ka ho lei hin , anachu chuchu kei ka tlingzo naw na ana.
Ka thil thaw ah ka buoia , video ka en , tiem ka nei , game kan hnel vel na ah ka ngaituona ah kan hmang chang hi atam lema kan hrietsuok hin pawi hi kati hlak a , ka bau rik lei khawm ani chuong naw a ka zie reng ni ding ana.
Hieng mi tamtak milo liemsan ta hai laia chuong deu bik chu Frankie Lungṭau kha ana.
Ka pa thi zo kum nawk vela thi kha ana , pawi kata Hostel anthawk ka hung tlansuok hiel a.
Tlangmi Hmar ṭawng hmang achun ama hi ka ruol hmasatak ana , ama le kanin ruol hma a kalo pawl hai chu hnam dang vawng an ni lei hin ama hi ka ngainatna adang rieu a.
Town ah ka pi hai pansak quarter a lo um hlak an na, kan in anthawk minute 5 lam vel ana.
School ṭin le chawlni inkhawm zoa hai hin ka sang Hrietpui lehin kan va leng hlaka.
Athi kum a kanin hmu tawp khan Lal field kola Hindi School, Picimas School chungah kan um khawm lai gate anthawk ami hung ko a chuchu ka hmu tawp na ana, a ni nâwk achun ka ruolpa Pangir lu hi chu lai hmun atho chun lung in a deng thi a chuchu Delhi a fe hma a , a chanchin ka hriet tawp tak ana , a chanchin ka hriet nawk chun a thi ti kha ana, ka awi thei naw a.
Hipo milo liemsan ta hai lai hin zu , damdawi le tuoksiet tuoka thi tamtak an uma anachu Frankie kha chuong ang chu ani ve naw a.
A chanchin hang hril ding taluo khawm ka hriet ta nawh , ka theinghil atam ta leihin , anachu ama kha mi hlim thei deu le innui rawn mi tak ani kha ka mithla ah acham zing a.
Ka hriet pakhat chu Don Bosco ah pawl khat kan thaw lai khan first bench tieng anmin ṭhungtir a zingkar assembly hma , school ka tlung zo vel chie hin a hung tlung ve a , ka bench ahung rawk rak kha ka tiffin a suk buoka a pute Joy teacher ah a ṭhanglai kha ana ami ngaituo lei khan sunah tiffin amin ṭawmtir a artui kan fak chu kala hrieta.
Thina hi hun sawt tak hi atawpna angin kalo ngai hlak a ka hung puitling a hrietthiemna ka hung nei deu hin atawpna nilovin ani dan ding tak hung inhersuok lem ni hin ka hrieta thlamuongna tak hi ka nei pha anih.
Hun inher dan ding lem chu ka hriet nawh anachu ka thi ding hun ka ngaituo in ka sang hai ta ding hin an mitthli tla lo khawp a thlamuongna an nei ve theina dingin entawn tlak a hringnun hmang hi ka nuom ve a.
Iem thaw thei ka neia ? ti kan ngaituo hin indik taka hringnun hmang bak chu iem a um leh?
Lungngaina a hlimna , ṭapna dinga khawm lawmna hmu thei khawpa hrat a an um thei hi ka beisei anih.
Keiah entawn tlak le inchuk tlak um naw sienkhawm , ka duthusam tak a ka nun ka hmang nuom danin ka nun hi lo thunun theinaw lang khawm , ka tum ti inmi hrietpui ve a ṭul a asanchu tumna ringawt khawm a huntawk leiin.
Asanchu famkim ei um si naw leiin.
Chuongchun milo liemsan ta hai lai ṭhang ve kata , ka fe hma a thil thung ding tamtak hai pawm thiem dan ka tuokta hai anthawk inchuk a , lungmuong taka in mangṭha theina dingin hi post hi chu hun hung tlung ding hai hrietthiemna ei nei thei na dingin kan hlan e.